×
Knope, vilt & krale: Armand eenvoud
Hoewel hierdie armband glad nie eenvoudig lyk nie, noem ek dit so omdat dit so maklik is om te maak. Met hierdie metode kan jy soveel verskillende en uiteenlopende armbande maak as waarvoor jy knope beskikbaar het.
×
Knope, vilt & krale: Armbandplesier
Dis regtig ’n plesier om armbande te maak, veral as jy eers halssnoere gemaak het. Jy kan hulle baie vinnig maak en dis boonop baie maklik. Deur bloot ’n knoop of twee of drie by te voeg, kan jy allerhande prettige en byderwetse bykomstighede maak. Gebruik knope met vier gate en ’n deursnee van 23 mm vir armbande. Dit gee jou die ideale basis om mee te begin.
×
Knope, vilt & krale: Blomtekkies
Jong kinders hou daarvan om hulle uit te dos en hierdie skoenspelde sal enige kleintjie se hart bly maak! Jy kan hulle in ’n ommesientjie maak en ook sorg dat jou kleinding ’n nuwe skoenspeld vir elke dag van die week het. Weer eens kan jy die basiese konsep gebruik en met verskillende vorms en kleure skoenspelde maak wat ietwat meer volwasse lyk. Die sagte blomborsspeld sal trouens pragtig lyk op die regte soort hofskoene!
×
Knope, vilt & krale: Borsspelde
Borsspelde wat met knope gemaak word, is beslis die vinnigste en maklikste manier om skeppend te raak en meer selfvertroue vir die volgende projek te kry. Jy kan nie foute maak daarmee nie en dis werklik bevredigend om hulle te maak.
×
Knope, vilt & krale: Borsspeldsakkie
Hierdie sakkie is maklik om te maak en perfek vir delikate borsspelde. Die sakkie en borsspeld is ’n pragtige Moedersdaggeskenk wat as ’n kleinood bewaar sal word.
×
Knope, vilt & krale: Delikaat
Mens verwag gewoonlik dat bykomstighede van knope groot en bonkig sal wees (dalk omdat dit soveel makliker is om met groot eerder as klein knope te werk!). Hierdie armbandjie is egter klein en fyn en hoewel dit moeiliker is om met die knopies te werk, is die resultaat beslis die moeite werd.
×
Knope, vilt & krale: Enkelstring-bewertjie
Ek het ’n pragtige skoenlapper vir hierdie hanger gebruik, maar jy kan dieselfde beginsels en metode gebruik om byna enige ander versiering te maak. Gebruik bloot ander vorms en kleure vir iets wat meer gepas vir ’n seun sal wees, of iets wat meer elegant is vir jou eie kamer. Ek dink hierdie hanger is perfek vir ’n meisie se kamer
×
Knope, vilt & krale: Feestelike versierings
Desembermaand is feestyd, en wat kan meer feestelik wees as hierdie prettige versierings? Jy moet vir hierdie projekte ’n aantal knope van ’n spesifieke grootte gebruik. Sorg dus dat jy al die nodige knope byderhand het voor jy die projekte aanpak.
×
Knope, vilt & krale: Gehekelde halssnoer
Ek is baie lief vir hekel, al moet ek erken ek is nie baie knap daarmee nie! As ek, met my uiters beperkte hekelvaardighede, dus hierdie halssnoer kan maak, kan jy dit ook doen. Ek het die basiese beginsels van hekel reeds verduidelik – raadpleeg dit gerus as hekel vir jou iets nuuts is. Nadat ek allerhande vasmakers vir hierdie halssnoer beproef het, het ek besef krimpkrale en ’n knip werk die beste. Ek is seker mense wat goed kan hekel, kan ’n baie beter manier vind om dit te doen deur net ’n knoop te gebruik.
×
Knope, vilt & krale: Groter beter
En baie, baie makliker! Hierdie bonkige halssnoer is trouens so maklik om te maak dat dit nie regtig nodig was om die metode met stap-vir-stap-foto’s te verduidelik nie! Die enigste probleem wat hierdie halssnoer dalk kan oplewer, is dat jy kan sukkel om genoeg groot, geronde knope daarvoor op te spoor. As dit gebeur, kan jy kleiner knope agter en langs die nek gebruik en die grotes vir die voorkant hou.
×
Knope, vilt & krale: Haarband
Haarbande vir dogtertjies sal nooit uit die mode raak nie; elke dogtertjie behoort trouens een te hê!
×
Knope, vilt & krale: Hartmagneet
Harte is altyd gewild en jy kan baie met hulle doen. Met hierdie patroon kan jy soos ek ’n magneet maak, of ’n borsspeld. Gee vrye teuels aan jou verbeelding. Met gebruik van verskillende steke, krale en knope kan jy elke hart heeltemal anders laat lyk. Dit is ook ’n goeie projek vir beginners aangesien daar geen reëls is nie: jy kan die hart versier nes jy wil – dit sal altyd mooi lyk!
×
Knope, vilt & krale: Horlosies
Dis nog ’n lekker projek wat kinders kan maak en dra, en hulle beslis lus sal maak vir handwerk. As jy jou kinders hierdie horlosie sonder jou toesig wil laat maak, sorg dat jy al die deeltjies vir die horlosies vooraf maak sodat hulle dit net kan saamvoeg. Laat hulle alkantkleefband eerder as ’n gompistool gebruik. Jong kinders sal hulp nodig hê met die naaldwerk, maar jy kan hulle ook ’n viltpuntpen gee om die horlosie se wyserplaat te teken. Dit sal natuurlik baie lekkerder wees as Ma (of selfs Pa!) saam met hulle aan die projek werk.
×
Knope, vilt & krale: Ietsie anders
Die knope wat ek vir hierdie projek gebruik het, is besonders en jy sal hulle waarskynlik nêrens anders kry nie, maar ek wou jou wys watter verstommende verskeidenheid knope beskikbaar is. Hierdie knope is handgemaakte olyfhoutknope. Ek is seker daar is minstens een vaardige houtwerker in elke familie; daag dus joune uit om vir jou ook sulke unieke knope te maak.
×
Knope, vilt & krale: Japtrap haarknippe
Dit is ’n maklike, vinnige projek en perfek as jy ’n klomp afvalstukkies vilt het en nie weet wat om daarmee te maak nie.
×
Knope, vilt & krale: Kinderhalssnoer
Hierdie halssnoer met sy helder kleure sal by ma’s en dogters ’n treffer wees. Dit is ’n goeie projek om saam aan te pak en neem nie lank nie. Danksy die waskoord is dit ’n duursame halssnoer vir ’n kind.
×
Knope, vilt & krale: Knoopring
Ringe wat van knope gemaak word, is groot pret. Jy kan kleintjies maak, maar die grotes kan baie indrukwekkend wees! Versamel groot ou jasknope van alle vorms en groottes; vir die middelste deel kan jy kleiner knope van jou keuse gebruik.
×
Knope, vilt & krale: Knope vir Afrika
Vir halssnoere waarvoor ’n groot getal krale nodig is, is ’n naald jou beste vriend. Toe ek met knope begin eksperimenteer het, het ek dit met die hand ingeryg en dit het ’n ewigheid geneem! Ek het ook op die moeilike manier geleer dat knope met een plat kant glad nie vir dié soort halssnoer deug nie. Gebruik knope wat gerond is, verkieslik aan albei kante. Anders lyk die halssnoer dikwels of dit in die middel onderbreek is en vorm dit nie ’n mooi gladde ronding nie.
Wanneer ek gaan knope soek, neem ek twee naalde met waskoord geryg saam en toets verskillende knope uit om te sien of hulle geskik sal wees. Jy kan dit gerus ook doen om te verseker dat jy nie bly sit met ’n spul knope wat nie werk vir die pragtige halssnoer wat jy in gedagte gehad het nie.
×
Knope, vilt & krale: Knopiearmband
Is jy opgeskeep met al daardie oorskietknopies? Hier is ’n maklike, prettige manier om hulle te gebruik. Hierdie armband het ’n viltbasis en is dus baie gemaklik om te dra.
×
Knope, vilt & krale: Kolwyntjiepret
Dis pure plesier om hierdie kolwyntjies te maak. Gebruik hulle as speldekussings, versierings in jou werkplek of kombuis, geskenke vir ’n vriendin met ’n voorliefde vir kolwyntjies, of maak hulle bloot vir die lekkerte!
×
Knope, vilt & krale: Kort en klaar
Hierdie kleurryke strophalssnoer is baie eenvoudig en vinnig om te maak. Gebruik ’n interessante, kleurryke verskeidenheid knope met verskillende vorms en groottes. Jy het nie so baie knope vir hierdie projek nodig nie, maar wel ’n groot verskeidenheid. Deursoek jou knoopversameling en hou belowende knope eenkant. Eksperimenteer daarmee tot jy tevrede is met jou kombinasie.
×
Knope, vilt & krale: Liewenheersbesies
Hierdie yskasmagnete in die vorm van liewenheersbesies is van my grootste gunstelinge. Jy kan wikkelogies gebruik in plaas van krale – dit is ook makliker om dit vas te plak.
×
Knope, vilt & krale: Maklike oorringe
Dis maklik en vinnig om oorringe van knope te maak. Plak ’n knoop op ’n oorringbasis, en siedaar, jy het ’n pragtige, eenvoudige knoopoorring! Jy kan skakelringe gebruik om knope by te voeg wat beweging en lengte aan die oorring gee. Jy kan die basis vir oorringe by handwerk- of kralewinkels kry en daar is baie om uit te kies. Die basis wat ek gebruik het, het ’n ekstra ring (opening) in die basis. Jy hoef nie die ekstra ring te gebruik nie, maar dit kan nuttig wees.
